ភ្នំពេញ៖ មន្ទីរសុខាភិបាលរាជធានីភ្នំពេញបានប្រកាសរកឃើញបាតុករប្រឆាំងក្រុមហ៊ុនណាហ្គាវើលចំនួន២៩នាក់បន្ថែមទៀតនៅថ្ងៃនេះ ដែលធ្វើឱ្យចំនួនអ្នកឆ្លងសរុបមកដល់ពេលនេះមានចំនួន៣៤នាក់ហើយ។ មន្ទីរសុខាភិបាលណែនាំដល់ក្រុមបាតុករទាំងអស់ដែលប៉ះពាល់ផ្ទាល់ជាមួយអ្នកផ្ទុកជំងឺកូវីដ-១៩ ទាំងអស់នេះឱ្យដាក់ខ្លួននៅដាច់ដោយឡែក៧ថ្ងៃមុននឹងធ្វើសំណាកកូវីដ-១៩។
ក្នុងសេចក្ដីជូនដំណឹងចុះថ្ងៃទី៦ ខែកុម្ភៈ ឆ្នាំ២០២២នេះ មន្ទីរសុខាភិបាលនៃរដ្ឋបាលរាជធានីភ្នំពេញបានណែនាំថា៖ «ក្រុមបាតុករ ទាំងអស់ដែលជាអ្នកប៉ះពាល់ផ្ទាល់ជាមួយអ្នកវិជ្ជមានកូវីដ-១៩ ត្រូវធ្វើចត្តាឡីស័ករយៈពេល ៧ថ្ងៃ ដោយគោរពឱ្យបានម៉ឺងម៉ាត់បំផុតតាមវិធានការសុខាភិបាល។ បន្ទាប់ពីការធ្វើចត្តាឡីស័កចប់ត្រូវយកសំណាកនៅតាមកន្លែងដែលបានកំណត់ និងរាយការណ៍អំពីលទ្ធផលមកអាជ្ញាធរមូលដ្ឋាន និងមន្ទីរសុខាភិបាលជាកំហិត»។
មន្ទីរសុខាភិបាលក៏ស្នើដល់អ្នកជាប់ពាក់ព័ន្ធជាមួយក្រុមបាតុករទាំងអស់ឱ្យទៅធ្វើសំណាករកជំងឺកូវីដ-១៩ផងដែរ។
ការរកឃើញករណីវិជ្ជមានជាបន្តបន្ទាប់បាតុករតវ៉ាណាហ្គាវើលនេះគឺបន្ទាប់ពីអាជ្ញាធរបានរកឃើញវិជ្ជមានលើស្ត្រីមានផ្ទៃពោះម្នាក់ដែលជាសមាជិកនៃក្រុមបាតុករមានផ្ទុកកូវីដ-១៩ ប្រភេទអូមីក្រុងកាលពីពេលថ្មីៗនេះ៕